Tuesday, December 8, 2009

شبشبي الطائر : يعيش يعيش يعيش






بوست هدية

البوست داه أنا كتبته في بنين أفكاري ..معلش أصل أنا معنديش بنات ..النهارده الصبح و أنا باحاول أنام ..أصلي كنت متضايقه قوي علشاني وعلشان غيري ..الأيام اللي فاتت كل الأخبار اللي بنشوفها أو نسمعها أو نقراها بتقول بصوت عالي .مافيش فايدة...و حتى لما أتكلم مع الصديقات و الأخوة في المدونات ألاقي أحزان وغضب و ضيق و خلافات






و أكيد الواحد علشان بيحب كل اللي حواليه بيزعل لزعلهم.بس أنا على أد ما أنا عصبية إلا إني تقدروا تقولوا مع المصائب والويلات هادئة وزوجي بيبقى مفروس مني ..يعني ولله الحمد أنا كده تقدروا تقولوا من كتر ما جريت بالبنين بتوعي للمستشفى علشان غرزة هنا أو زايده هنا أو فتق هناك ..دلوقتي لما بقيت بادخل المستشفى بالاقيهم بيفتحولي الباب بابتسامة ناس عشرة ومرة إحدى الممرضات قالتلي : يا مدام المفروض انتي تعملي كارنية للمستشفى يعملولك تخفيض ..طبعا زوجي في المواضيع دي بيبلغ فرار و مش الاقيه إلا بعدما أعمل العملية أو أخلص المأمورية ..هو كده ..وبالتالي لازم أنا أكون جبل جليدي في الأزمات ..وبالفعل ولله الحمد مهما أمر في أزمات بارفع راسي لربنا و اقول : اجعلها مكفرات ذنوب يارب وفي ميزان حسناتي ..الخير منك يارب والشر من أنفسنا..إحنا بنتكلم عن إيه أساسا؟


أه البوست الخفيف داه هدية لأي واحد زعلان ومتضايق و قرفان ووووووو



زي ما إنتم عارفين الغضب بيعمل إيه في الناس؟ و أنا من الناس اللي لما أحس بمخي مليان بهموم بادي مخي أجازة



طيب أصلي يعني مينفعش ازعل و أغضب واتنرفز و أنا معايا في البيت عصابة مفترية طول اليوم بيصرخوا ويتخانقوا و يضربوا بعض فلازم اكون كووول



طبعا حتسألوني إزاي كوول حاقولكم: الصبيان طبعا بيجروا بسرعة البرق و أنا بصفتي أم ولازم تكون لي هيبة مش معقول حاقوم أجري وراهم و أساسا أساسا لو جريت مش حاحصلهم و حاقول آي آي الديسك والنتيجة حتكون مش حلوة

حتى المرة اليتيمة اللي تدخلت فيها بين اتنين بيلعبوا مصارعة حرة



كانت النتيجة إن صباعي اتخبط خبطة في المنضدةوقعدت شهر كامل لابسه صباع حديد في إيدي

و أنا أساسا من الناس اللي بتقشعر من الحديد مع الحديد يعني مجرد وأنا باكتب كلامي داه قشعرت الحديد مع الحديد يعني مجرد وأنا باكتب كلامي داه قشعرت وسناني خبطت في بعضها

وطبعا مش حاحطلكم صورة صباعي ابو حديد




المهم بقى نرجع للموضوع الأساسي ....اللي يسألني بتتعاملي مع العصابة المفترية دي ازاي أقولكم كلمتين وبس

شبشب طائر



ومش أي شبشب مثلا شبشب قماش ناعم ولا شبشب بلاستيك لا علشان لازم البس شبشب له كعب متين علشان أنا ركبي حديد ولو لبست الشباشب السخيفة الرقيقة دي



ركبي توجعني والوجع يطلع عالعمود المايل وتبقى قضة طويلة...يعني من الآخر شبشبي الطائر شكله يشبه لداه



الولد من دول يجري مني قبل ما يكمل تلات خطوات أكون رافعه الشبشب وطراخ يلبس بقى مكان ما يلبس ودائما يصيب الهدف و بإجادة...ابني الكبير طبعا في الجامعة و بصراحه هو مهذب ومحترم وميجيبش التهزيء لنفسه من صغره فدايما الاتنين اللي في النص اللي غاويين عذابي هم اللي بيصيبهم الهدف ..وبما إننا عائلة بتاعة رماية زوجي والأبناء وقبلهم أبويا فابني بيقولي انتي كنتي حتجيدي الراية يا أمي ولو عملوا أولمبياد شباشب طائرة حتاخدي الميدالية الذهبية

طيب حطوا نفسكم مكاني يا ناس ..أنا الجيران لما بصادف أركب معاهم الأسانسير بيبصولي بشفقة وبابتسامة والاقي جارتي تقولي الله يعينك باسمع صوتك معاهم طول النهار والليل..

أخ بتسمع صوتي؟ يبقى الشبشب أحسن والا إيه؟؟؟؟؟؟؟؟؟؟؟؟؟؟؟؟؟؟ عموما هو شبشب مش حذاء زي اللي بوش أخده ومش خسارة في طيبة قلبه أبدا





أقول لكم كلمة سر.؟؟؟

أعرف واحده صاحبتي مرة حدفت بنتها بدكتور شول والبت يا نضري الششب لبس في عينها وهي عارفه نفسها ومش عارفه أكيد حتدخل تموتني في مدونتي



فيه حد لسه زعلان؟ تعالوا زوروني في بيتي تجدوا ما يسركم


34 comments:

KHALED said...

هههههههههههههههههههههههههههه

أنا من كتر الضحك مش حاينفع أعلق و السبب الأهم أن إللى بتحكى علية دة أنا عايشة سيادتك مع العصابة ولادى بس الفرق بينا بقة إنى باستخدم شب شب الحمام الصينى الطرى و أجرى و را العيل من دول لحد ما أطولة و هاتك ياضرب بس على المقعدة فقط علشان الإصابات

ربنا يسعدك و يعينك و يعينا

مشروع دكتور said...

انا مره اصبانى نفس الهدف من ماما بس المكنسه بقى النتيجه بسيطه
فتحت دماغى بس
ههههههههههههههههههه
ايام والله

كلمات من نور said...

احاول تصورك يا خالد تمسك فرشاة الرسم بيد وباليد الأخرى تمسك الشبشب وبتجري ورا الأولاد؟

هههههههههههههههههههه ربي يخليك ليهم ويخليهم لك وللوالدتهم يارب؟.نورتني

Dr. Ibrahim said...

لا معدش ينفع الكلام دا
لازم يبقى فيه مواثيق دولية لتحديد العلاقات لنزع الخلاف الناشب بين المتصارعين
وإلا ستذهب الشرعية الدولية هباءاً
هباءاً
هباءاً
ربنا يحميهم ويحفظهم
ويحفظنا ويحفظ كل مسلم

Mona said...

شبشب يامفترية - أنا بقى عندى تناحة يعنى لما بلاقيهم بيتخانقوا وهما فى الجامعة أقول لهم ماتنسوش تموتوا بعض فيبصوا لى ويتكتموا لانهم يدركوا كم جننت
أما جوزى فالبرود بعينيه يعنى ممكن أتنتط أنا وألبس نفسى الشبشب فى دماغى وهو فيه ايه ايه ياجماعة زعلانين ليه هو فيه ايه - والحمدلله الذى لا يحمد على مكروه سواه وبرضة فى ميزان الحسنات يارب بأذن الله يا أم البنين - سلامى للشبشب

كلمات من نور said...

تـــيك كـــير

آي آي آي كام غرزة يا فتاتي الطيبة؟عملتي لماما إيه؟
أنا مرة برضه من كام سنة كنت ماسكه زجاجة مانيكير في إيدي وكان أحمد ابني حوالي 9 سنوات ..دلوقتي 22 وكنت بارجها انتي عارفه بقى المانيكير وكان هو واقف على ظهر الكنبة وبوووم وقع أنا حدفت الازازة علشان اجري عليه جت في دماغه عورتها
ههههههههههههههههههههههههههه
لو سمعني حيقتلني
تحياتي يا قمر

كلمات من نور said...

دكــــتور أبـــراهيم

انت في مصر يا دكتور المواثيق دي مش معترف بيها .أنا مرة كنت بافكر أهاجر كندا وبعدين قريبي في كندا قالي صوات وصراخ في العيال لا ياخدوهم منك ...قلتله يبقى خلينا بكرامتنا وشباشبنا في مصر.
تحياتي

كلمات من نور said...

منــــى

تعالي عندي يومين أو يوم وانتي تعرفي لماذا أستخدم الشبشب

زوجي عنده نفس الهدوء يبقى قاعد يقرا الجريده واقوله : قول ليحيى ادخل ذاكر ..من غير ما يبصلنا يقول ليحي : اسمع كلام ماما يا يحيى وادخل نام!!!!!!!!!!!يالهوي

Unknown said...

ربنا يخليهم يارب
وما تتحرمى منهم
ولا يتحرموا من
شباشبك ابداااااا
أختى الكبيرة برضه كانت
تستعمل نفس(السلاح)بتاعك
لما كان اولادها صغيرين عقبال
ما تشوفى اولادك كبروا وبقوا امهات وأباء

Unknown said...

عايزة اقولك
خلى بالك من نفسك
وماتتنرفزيش خليكى :كوووووووول

كلمات من نور said...

نورهـــاتي

لا متقلقيش لازم أكون كووول خالث وبعدين عندي اتنين من البنين بقوا في الجامعه ..أينعم التاني منهم لسه محتاج شبشببي و شباشب البيت كلها..الكبير محترم من يومه وبرضه الاتنين الصغيرين واحد منهم محترم والتاني شباشب البيت كلها مش خسارة فيه.تحياتي

رئيس التحرير said...

السلام عليكم ورحمه الله وبركاته
بعد إذن حضرتك
انا لن اعلق علي الموضوع
ربما الاقي شبشب في قفاي
ربنا يخليه لك ويبارك لك فيهم

كلمات من نور said...

رئيس التحرير

أضحك الله سنك..تعلم زوجي و اتنين من أبنائي ..اللي نادرا ما أحدفهم بالشباشب .إنهم يبتعدون عن مرمى يدي أثناء الحدف ..وكمان ابني الصغير دايما لما أحدف اخواته بالشبشب يروح يجيبهولي..الاتنين اللي في النص بقى ممكن يخبوه مني بس على مين من قلة الشباشب في البيت...نورتني

طهر فؤادك said...

السلام عليكم ورحمة الله وبركاتةة

ربنا يكرمك يارب بالخير دايما ويخليللك اولادك اللهم امين والمسلمين ويكونوا قرة عين ليكم يارب اللهم امين ويجعلهم من حفظة القران الكريم والعاملين بة اللهم امين والمسلمين

وضحكتتتتتينى اوى ربنا يكرمك هههههههه

كلمات من نور said...

ابني الحاج عندنا؟ يا مرحبا يا مرحبا
أضحك الله سنك يا بني ورزقك حبه وحب من يحب وحب عمل يقربك إلى حبه...نورتني

Unknown said...

شباشب قوم عند قوم فوائد
سيف الدين...هو اسم ابنى الاوسط تكبره بنت وتصغره بنت واناديه فى ساعة الرضا عنه ب " مشمش"
اعطاه الله خفة دم وسرعة بديهة تجعلنى فى عز غضبى عليه أضحك واستغرب كيف جاء بهذا التعليق الخرافى فى العبقرية...عارف عارف حد هيقول القرد فى عين أبوه...بس اللى يعرفنى يعرف انى متهم بانى مثقف وكاتب ساخر وصعب اضحاكى لشعورى بانه لاجديد يضحك فقد استهلكت معظم التعليقات الساخرة وعليه عندما يات احد بجديد هنا فقط اموت ضحكا
نرجع لمشمش افندى فى يوم لم يشفع له محاولة اضحاكى وانا فى عز موجة غضبى فتناولت سلاح الاخت نور صاحبة المدونة الشبشب الطائر خصوصا وانا اعمل فى مجال تطير فيه الاشياء وقذفته به ناهيك عن تلويه كالثعبان متفاديا الضربة فهو لاعب كاراتيه ولاعب كرة قدم مسجل فى اتحادي اللعبة...المهم انا الذلى صرخت من الألم من مفصل ذراعاى مع الكتف لما تشمللت وفردته على الاخر مسددا قذيفة الشبشب...
وحتى لا اطيل عليكم فقد اكتشفت تيبسا شديدا فى هذا المفصل نتيجة اصابة لم ألق لها بالا وانا خارج البلاد ودخلت فى رحلة علاج طبيعى طويلة لم تنته حتى الان
وطبعا لم أتوقف عن قذائف الشباشب فمنها اعلم مدى شفاء مفصل الذراع على حسب كمية الألم
ويجعله عامر
ملوحظة: ابنى فى السادسة ابتدائى

لجين أبو الدهب said...

:D
أضحك الله سنك

طب ما ينفعش يتبدل بحاجات تانية اطباق كراريس

وعن تجربة الكراريس لها ضربة قوية على فكرة :D

ربنا يهديهملك ويجعلهم ذرية صالحة لكى ..

دمتِ بخير ..

كلمات من نور said...

حســــام

ألف سلامه على كتف سيادتك هي الفكرة إن الشباشب دي تخصص نسائي ..بس حتى الصحفي في العراق قلدنا يعني العملية بقت نسائي ورجالي و برضه الأطفال بياخدوها بهزار إلا لو الإصابات وصلت لمراحل تحتاج غرز وغياب زي تيك كيرو الأخ سامر...الفكرة ان الواحد مافيش فيه نفس يجري ورا العيال علشان شكله ميبقاش اي كلام فالشبشب يسبقهم ويؤدي الغرض.نورتني

كلمات من نور said...

لجين أبو الدهب

و أنا اللي كنت فاكرة إني الأم الوحيدة الشريرة واللي أولادها عصابة مفترية ..اترينا كلنا في الهوا سوى ..بس ضرب بأسلحه لا حرام وبعدين الواحد أساسا بيضربهم ويرجع ضميره يوجعه بالرغم من إنهم معجونين بماء عفرته..وبعدين الضرب بالكراريس والكراريس تقطع ويعيدوا كل اللي فيها؟؟؟؟؟؟ لا كفاية الساعات اللي بتضيع وقت المذاكرة معاهم......نورتيني يا لجين

مامة مازن said...

هههههههههههههههههههههههههههههه
ربنا يخليكى ليهم ويخليهوملك
ولازم تشتركى فى الاوليمبياد الشباشبى لما يعملوها
ههههههههههههههههههه

دمتى بكل خير

قرات موضوعك السابق ممتاز جدا
شكرا جزيلا ليكى

كلمات من نور said...

مامة مازن

الأوليمبياد الجاية في لندن أعتقد ..دعواتك ابني إبراهيم يدخل فيها في فريق الرماية ووقتها أروح معاه و أقترح عليهم هذه الفكرة.هههههه

بارك الله فيكي وجزاكي كل الخير عني...نورتيني

جارة القمر said...

اوووووووووووووووووووه

أسرتك ما احلاها
بجد مميزة وانتي روحك خفيفة جدا
البوست موتني من الضحك
يعطيكي العفية
وربنا يديكي الصحة وتربيهم احسن ترباية

ودي وحبي

Unknown said...

انا ضحكت ضحك
و التعليقات كملت عليا
هههههههههههههه
ربنا يخليكى ليهم
و تعيشى و تضربيهم بالشبشب

بس فى الأخر دوووول ولادك
مش زى اسامة جارى العزيز فى القصة اياها
هههههههههههههه
:-)

كلمات من نور said...

بـــدروي

انا قلت أثقفك جزماتيزم و شبشبيزم اهي كلها ثقافات واديك شفت التعليقات للأمهات و الأباء استخداماتهم .نورتني

باحث عن حب said...

انا نقلت البوست ده فى جروبى على الفيس بوك انا اسف
وهو بوست عثل
جزاكى الله خيرا

كلمات من نور said...

الباحث عن الحب

أهلا بك في مدونتي و طالما نقلت البوست وكتبت الموقع الخاص بمدونتي يبقى أهلا بك وسهلا .....تحياتي

باحث عن حب said...

http://www.facebook.com/topic.php?uid=105964059436951&topic=9
ده اللينك
ياريت تشرفينى فى مدونتى المتواضعه
ولو ممكن اضيف المدونه بتاعتك فى مدونتى الصغيره

كلمات من نور said...

الباحث عن الحب

أنا دخلت مدونتك وكتبت تعليق في موضوعك عن البحث عن الذات و مرحبا بك في ضم مدونتي عندك في مدونتك ولك الحرية في اختيار أي من الثلاث مدونات ...تحياتي

سامر محمد عرموش said...

هههههههههههههههههههههههه
والله موتيني من الضحك
وصار نفسي ازوركم في البيت
لارى الشباشب الطائرة على الاقل حقيقة مش مثل الصحون الطائرة
انا عن نفسي واكل شبشب طائر من ايدين الوالدة الله يخليها ويطول في عمرها على عيني الى اليوم بعد حوالي 38 سنة فاكر حلاوته
اي اي اي
تغيبت عن المدرسة بسببه ثلاث ايام
وهي المسكينة ماتت خوف لما شافت الدم ينفر من عيني

ويمكن هذا الحادث جعلني لا استعمل الشباشب الطائرة ابدا
اكيد عقدة نفسية
تحياتي
سامر

يا مراكبي said...

هو إيه اللي يعيش يعيش ده؟
عنه ما عاش ولا كان
:-)

وبالمناسبة السعيدة دي أحب أهديكي البوست ده واللي تم نشره برضه في كتابي الأخير "عليك واحد" وهو
http://yamarakby.blogspot.com/2008/07/blog-post_19.html#links

كلمات من نور said...

يا مراكبي

لا متقلقش عايش عايش ومتجدد للكبار والصغار

النسمة الرقيقة said...

ههههههههههههههههههههههه

رائعه جدا الفكره يا أمي ..
بس الحمد لله مبتستخدمش معانا ههههههههه

لأن أخواني مهما حصل ده شئ عادى جدااااااا ففيها ايه لما ينضرب بالشبشب بالنسبه ليه عادى تدريب على عدم الاحساس ههههههههه

Ahmed El_Desouky said...

انا بحمد ربنا أن والدتي بتلبس الشبشب القماش الناعم

كان زماني كل يوم في المستشفى أنا كمان


نايس تدوينة يا أستاذة نهى

Anonymous said...

حلوه مسابقة الشبشب الطائر
الله يمسيكي بالخير يا امي
:)
ظريف البوست يا قومندان

 
Copyright 2009 لحظة نور. Powered by Blogger
Blogger Templates created by Deluxe Templates | Blogger Styles
Wordpress by Wpthemescreator