ظهر سليم وصحة حديد وعمر مديد

بسم الله الرحمن الرحيم

ظهر سليم وعمر مديد

الأخوة والأخوات المدونيين والمدونات

في الفترة الأخيرة ازدادت حالات آلام الظهر والعمود الفقري ولقينا العم فشكوول 

مريض وفي أجازة بسبب آلام عرق النساو أنا كل فترة واخده أجازة إجبارية بسبب 

عمودي الفقري المايل ووووو وطبعا الأوجاع دي بسبب عدة أشياء منها:

الوقوف الخاطيء 

ومنها الجلوس الخاطيء على المكتب أو الكمبيوتر

وكيفية الجلوس المثالي 

ومن أهم الأشياء التي تعمل على راحة العمود الفقري في حالة كنت من يعمل كثيرا 

أعمال مكتبية أو مدمن كمبيوتر في الخير زي حالاتي ..لابد من الوقوف كل نصف 

ساعه والمشي بعض خطوات في أرجاء المنزل ...يعني أنا مثلا جالسة عدة ساعات 

لتجميع مواد هذا البوست ووضعه لكم ..قمت عدة مرات أثناء هذا اطمئننت على الأولاد

 ..وضعت بعض الغسيل في الغسالة ...قمت بعمل ساندويتشات لأبنائي الصغار و أبناء

 أختي حيث كانوا عندي ضيوف لساعتين..وهكذا أجلس لنصف ساعه ثم أقوم لأمشي

 في المنزل لأداء شيء ما و أقوم بالتمطي كما القطة ..اه والله بتشوفوا القطة بتشد 

جسمها ازاي تتمطى؟ في لغة التمارين بيسموا هذه العملية الاسترتشات ومش لاقيه لها 

مرادف في العربية غير شد الجسم والعضلات أو التمطي

كما أن هناك نوع أخر من آلام العمود الفقري 

ومنها بسبب عرق النسا والإنزلاقات الغضروفية سواء في العنق أو أسفل الظهر

 ويعتبر المشي من أهم الرياضات المريحة للعمود الفقري والمقوية لعضلات الساقين

  كما تعتبر وضعية الجبل

مهمة هي الأخرى

وتعتبر السمنة العدو الأول لآلام الظهر 


ولابد من اتباع رجيم للوصول للوزن القياسي 


ومش حاحكي لكم لو رحت عيادة شد العمود الفقري ووزنتني 


الدكتورة ولقت وزني زايد نص كجم


و أنا أساسا يعني اعتبر عصفورتن على رأي أم البنات


الدكتورة بتزعل وتقولي أي كجم بيحمل بمقام 7 كجم عالعمود 


الفقري وتتعبي وياريت تعملي ريجيم


( وش متعجب وممتعض)

كما أن تماريت الاسترتشات أو التمطي تعتبر هامة جدا

و بتساعد في شد العضلات والنحافة

وبما إن العمود الفقري هو عمود الجسم فآلامه تتسبب بمشاكل 


كثيرة تؤثر سلبا على 

الإنسان و تدخله في دائرة مستمرة من الألم والمرض

وبعد سنوات من زيارات لمئات الأطباء بسبب عمودي الفأري ،


 عفوا الفقري ، وبعد 

سنوات من الخبرة كمريضة عمود فقري وبعد زيارتي لآلاف من 


المواقع الطبية 

والعلاجية والرياضية قلت لابد و أن أشارككم خلاصة وعصارة ما


 توصلت إليه و

 أفادني أحيانا كثيرا وطبعا عندي عشرات ومئات من الملفات 


وصور إلا إن معظم هذه

الصور مع الأسف لفتيات يرتدين ما قل من الملابس بس بعد بحث


 الحمدلله لقيت موقع

 للتمارين الرجالي من يوجا 

فاليوجا كرياضة وليس فلسفة ، علشان أنا عارفه المعارضين على


 فلسفتها و أنا منهم ،

 تساعد تمارينها بصورة رائعة على راحة العمود الفقري 

http://www.yoga-for-men.com/yoga_bigfour.html

تمارين استريتش للرقبة : فيديو

http://video.about.com/exercise/Neck-Stretches.htm

تمارين البيلاتس

pilates

وهي نوع من تمارين يشبه كثيرا لليوجا و الاستريتشات

تمارين باستخدام حبل أو شريط المقاومة

resistance-band-exercise

 تمارين باستخدام الكرة

والحديد

وهناك العديد من أشكال الطب البديل والذي يساعد على تسكين الألم وبناء الجسم 

عضليا مثل :الحجامة

و الحجامةهي سنة نبوية عن رسول الله صلى الله عليه وسلم كما قال في الحديث 

الشريف : علاج أمتي في ثلاث : شرطة محجم وشربة عسل وكية بنار وانا انهى امتي

 عن الكي ...صدق رسول الله

الكايروبراكتيك

والكايروبراكتيك هو نوع من أنواع طب العلاج الطبيعي يعتمد على علاج العمود الفقري 

 لراحة الجسد وحقا أجد راحة تامة بعد كل جلسة أقوم بها و أشعر أنني في حاجة إلى 

نوم عميق بلا ألم.. ويوجد بالقاهرة والإسكندرية بعض عيادات الكايروبراكتيك وممكن

 أمد من يريدها بالأرقام والعناوين

كما أن الإبر الصينية تعتبر علاج جيد لتسكين الألم 

كما يوجد غيرهم من الطب البديل كتمارين التشي كونج

 و جلسات الريكي

والريفلوكسولجي الخاص بتدليك اليدين والقدمين لوجود مراكز عصب لكل أعضاء 

الجسم فيهم

وفي النهاية أضع لكم بعض الفيديوهات و التمارين الخاصة بالعمود الفقري كما سأقوم 

بوضع ملفات خاصة بالعمود الفقري و التمارين على موقع

فورشير

فيديو لبعض التمارين المفيدة أثناء الجلوس على المكتب والكمبيوتر لفترات طويلة

http://video.about.com/ergonomics/Ergonomics-at-Work.htm

بعض تمارين مفيدة للعمود الفقري

كتاب عن الظهر وعلاجه قمت بتحميله على موقع فور شير

http://www.4shared.com/file/176174952/c03dbe74/back_care_book.html

ملف للتمارين الاسترتشات الصباحية

http://www.4shared.com/file/176180256/c637950a/morning_stretches.html

ملف لتمارين لمن يجلس كثيرا

http://www.4shared.com/file/176182848/9f0ac411/sitting_too_muchdo_these.html

ملف لتمارين الاسترتشات

http://www.4shared.com/file/176188207/9f37936/STRETCHES.html

ملف لتمارين استرتشات باليوجا

http://www.4shared.com/file/176188981/241cb9ea/yoga_stretch.html

وفي النهاية أي سؤال أي استشارة أنا مريضة على درجة دكتور عظام وعلاج طبيعي

 وطب بديل .. أسأل الله أن يشفي مرضانا ومرضى المسلمين أجمعين

آمين آمين آمين
***************

*******************

ملحوظة هامة جدا: كان أول تعليق من ابني النشيط الدكتور إبراهيم صاحب مدونة المرحوم في 

الثلاجة ولفت نظري لشيء مهم جدا إن أي مريض لو قام بعمل هذه التمارين وحده 

بدون مشرف ممكن يصاب بمشاكل أكتر مما لديه وفعلا كلامه سليم مائة بالمائة و أنا 

أخذت شهر كامل تأهيل في عيادة شد العمود الفقري وكنت باعمل التمارين دي بإشراف

 بيبة العلاج الطبيعي وكمان قمت بعمل تمارين اليوجا والتشي كونج والبيلاتس تحت 

إشراف مدربين في مركز خاص في الإسكندرية ...شكرا خاص للدكتور إبراهيم ويارب 

ينجح و أشوفه معيد في كلية الطب ويوصل لأعلى المراتب .

قولوا آمين

شبشبي الطائر : يعيش يعيش يعيش

بوست هدية

البوست داه أنا كتبته في بنين أفكاري ..معلش أصل أنا معنديش بنات ..النهارده الصبح و أنا باحاول أنام ..أصلي كنت متضايقه قوي علشاني وعلشان غيري ..الأيام اللي فاتت كل الأخبار اللي بنشوفها أو نسمعها أو نقراها بتقول بصوت عالي .مافيش فايدة...و حتى لما أتكلم مع الصديقات و الأخوة في المدونات ألاقي أحزان وغضب و ضيق و خلافات






و أكيد الواحد علشان بيحب كل اللي حواليه بيزعل لزعلهم.بس أنا على أد ما أنا عصبية إلا إني تقدروا تقولوا مع المصائب والويلات هادئة وزوجي بيبقى مفروس مني ..يعني ولله الحمد أنا كده تقدروا تقولوا من كتر ما جريت بالبنين بتوعي للمستشفى علشان غرزة هنا أو زايده هنا أو فتق هناك ..دلوقتي لما بقيت بادخل المستشفى بالاقيهم بيفتحولي الباب بابتسامة ناس عشرة ومرة إحدى الممرضات قالتلي : يا مدام المفروض انتي تعملي كارنية للمستشفى يعملولك تخفيض ..طبعا زوجي في المواضيع دي بيبلغ فرار و مش الاقيه إلا بعدما أعمل العملية أو أخلص المأمورية ..هو كده ..وبالتالي لازم أنا أكون جبل جليدي في الأزمات ..وبالفعل ولله الحمد مهما أمر في أزمات بارفع راسي لربنا و اقول : اجعلها مكفرات ذنوب يارب وفي ميزان حسناتي ..الخير منك يارب والشر من أنفسنا..إحنا بنتكلم عن إيه أساسا؟


أه البوست الخفيف داه هدية لأي واحد زعلان ومتضايق و قرفان ووووووو



زي ما إنتم عارفين الغضب بيعمل إيه في الناس؟ و أنا من الناس اللي لما أحس بمخي مليان بهموم بادي مخي أجازة



طيب أصلي يعني مينفعش ازعل و أغضب واتنرفز و أنا معايا في البيت عصابة مفترية طول اليوم بيصرخوا ويتخانقوا و يضربوا بعض فلازم اكون كووول



طبعا حتسألوني إزاي كوول حاقولكم: الصبيان طبعا بيجروا بسرعة البرق و أنا بصفتي أم ولازم تكون لي هيبة مش معقول حاقوم أجري وراهم و أساسا أساسا لو جريت مش حاحصلهم و حاقول آي آي الديسك والنتيجة حتكون مش حلوة

حتى المرة اليتيمة اللي تدخلت فيها بين اتنين بيلعبوا مصارعة حرة



كانت النتيجة إن صباعي اتخبط خبطة في المنضدةوقعدت شهر كامل لابسه صباع حديد في إيدي

و أنا أساسا من الناس اللي بتقشعر من الحديد مع الحديد يعني مجرد وأنا باكتب كلامي داه قشعرت الحديد مع الحديد يعني مجرد وأنا باكتب كلامي داه قشعرت وسناني خبطت في بعضها

وطبعا مش حاحطلكم صورة صباعي ابو حديد




المهم بقى نرجع للموضوع الأساسي ....اللي يسألني بتتعاملي مع العصابة المفترية دي ازاي أقولكم كلمتين وبس

شبشب طائر



ومش أي شبشب مثلا شبشب قماش ناعم ولا شبشب بلاستيك لا علشان لازم البس شبشب له كعب متين علشان أنا ركبي حديد ولو لبست الشباشب السخيفة الرقيقة دي



ركبي توجعني والوجع يطلع عالعمود المايل وتبقى قضة طويلة...يعني من الآخر شبشبي الطائر شكله يشبه لداه



الولد من دول يجري مني قبل ما يكمل تلات خطوات أكون رافعه الشبشب وطراخ يلبس بقى مكان ما يلبس ودائما يصيب الهدف و بإجادة...ابني الكبير طبعا في الجامعة و بصراحه هو مهذب ومحترم وميجيبش التهزيء لنفسه من صغره فدايما الاتنين اللي في النص اللي غاويين عذابي هم اللي بيصيبهم الهدف ..وبما إننا عائلة بتاعة رماية زوجي والأبناء وقبلهم أبويا فابني بيقولي انتي كنتي حتجيدي الراية يا أمي ولو عملوا أولمبياد شباشب طائرة حتاخدي الميدالية الذهبية

طيب حطوا نفسكم مكاني يا ناس ..أنا الجيران لما بصادف أركب معاهم الأسانسير بيبصولي بشفقة وبابتسامة والاقي جارتي تقولي الله يعينك باسمع صوتك معاهم طول النهار والليل..

أخ بتسمع صوتي؟ يبقى الشبشب أحسن والا إيه؟؟؟؟؟؟؟؟؟؟؟؟؟؟؟؟؟؟ عموما هو شبشب مش حذاء زي اللي بوش أخده ومش خسارة في طيبة قلبه أبدا





أقول لكم كلمة سر.؟؟؟

أعرف واحده صاحبتي مرة حدفت بنتها بدكتور شول والبت يا نضري الششب لبس في عينها وهي عارفه نفسها ومش عارفه أكيد حتدخل تموتني في مدونتي



فيه حد لسه زعلان؟ تعالوا زوروني في بيتي تجدوا ما يسركم

صحتك من شنطتك وحذاؤك

صحتك من شنطتك وحذاؤك

الجملة دي صحيحة 100% علشان أسباب كتير قوي حاعرضها عليكم في صورة حكايات خاصة بي كمريضة مزمنة ( وجه ضاحك) و استحملوني بقى جايز تلاقوني بادخل من نقطه لنقطه بس ساعات المواضيع
تتطلب هذا

من سنين طويلة و أنا باتعجب ليه الراجل بينزل من بيته يادوب بمفاتيح العربية ومحفظة صغنونة في جيبه الخلفي فيها البطاقة والفيزا على كارتين مهمين وقرشين والموبايل ودمتم في حين الغالبية المطلقة من الستات بينزلوا بشنطة شبيهة لشنطة السفر الهاند باج وفيها أشياء و أشياء مهمة وغير مهمة بالمرة؟؟؟؟
ويرفعوا ابهامهم بعلامة البرافو جداطيب مش بقى الشنطة دي مفيدة؟؟

ومرت السنين و أنا برضه شايله شنطة مقاس الهاند باج كده وفي مرة و أنا في عيادة العلاج الطبيعي في القاهرة احتاج الطبيب لمفك صغير علشان جهاز الليزر قمت فتحت شنطتي واديته المفك

قالي بتعملي بيه إيه داه؟ قلتله عندي اتنين من اولادي بيلبسوا نظارات وكل نص ساعه النظارات معووجه والمسمار اتفك ووقع
وفي جلسة تانية كان فيه مريض موجوع جدا ومحتاجين حبة مسكنة قمت فتحت شنطتي وطلعت شنطة صغنونه حاطه فيها أدوية للحالات الطارئة

لقيت الدكتور بيبصلي كإني على رأي المثل : يا ما جوه الجراب يا حاوي و قالي انتي جايه تتعالجي من العمود الفقري صح؟ قلتله : أيوه ياسيدي

قالي طيب ممكن أعرف فيه إيه تاني في شنطتك؟ قلتله جايز حد من الأولاد فضحك وقالي بجد عايز أعرف شنطتك فيها إيه...فتحت الشنطه أدامه وقلت افرجه أهمية ما بشنطتي




ووجدت فيها كالتالي :
ورق المناديل وورق مناديل مبللة و انتي بكتيريا ديتول و كراسة صغنونه وقلم حبر وقلم جاف و وورق علشان لو حبيت اكتب في الشارع وكتاب الأذكار وكاسيت صغير ( قبل زمن الام بي ثري بسنوات قليله ) و شريطين دروس دينية و المسبحة ومحفظة فيها خمسين صورة للأولاد ولزوجي و لأبناء أخوتي و أخواتي و بعض الاوراق المهمه وبعض الكروت الخاصة بالعيادة وبطاقتي الشخصية ورخصة السواقه ، بالرغم إني ما سقتش السيارة لأسباب أمنية مش حاحكيلكم عليها( وش بيضحك بإغاظه) إيه كمان إيه كمان.؟وزبدة كاكاو شفافة اللون وفوطة صغيرة لزوم الوضوء و عدة خياطة صغيرة وباكو شوكولاته لزوم القهوةوكتاب عن اليوجا كنت باستشير الطبيب فيه عن بعض التمرينات

بصلي الطبيب وقالي : شنطتك كده على طول والا بس علشان انتي على سفر؟

قلتله لا عادي يعني بس يمكن فيها حاجات كتير زيادة نظرا لإني باقضي يوم كامل في العيادة

وبعدين بالفعل بعض الحاجات بتكون مهمة

يعني على سبيل المثال : أنا عندي 4 بنين فتحسوا إني لازم أشيل معدات كشفية يعني من فترة كنا في القاهرة وبنفطر أنا و أبنائي الصغار في الفندق وجنبنا سواح يابانيين عمال يبصوا علينا : ما أصل الظاهر اللي بيلبسوا عبايه وخمار دول فرجه للسياح وجذب سياحي الظاهر
وخمار دول فرجه للسياح وجذب سياحي الظاهر

المهم دقيقتين وراح الأستاذ يوسف خبير التخريب قطع الكاسكيت بتاعته من الخلف وبقت مش محكمه على راسه والجو بتاع القاهرة حار و كنا في شهر أغسطس قمت طلعت عدة الخياكة الصغيرة و دورت على لون خيط مناسب وخيطتها لقيت اليابانيين بيبصولي كإني اخترعت الذرة و عمالين يقولوا اوه جوود



قالي : انتي شايفه الشنطه دي عامله ازاي؟؟ كل ما بتشيليها بتأثر سلبا على كتفك وعضلات الرقبة وخاصة إنك أكيد بتشيليها على جنب واحد فقط و أساسا انتي بتعملي علاج رقبة



يعني كل داه حمل على ظهرك وكتفك ورقبتك لو تحبي شيلي شنطه عالكتفين خفيفه ومتعلقيهاش على كتف واحد او حطي حاجات في اي كيس وامسكيهم بحيث بطن ذرعك يكون لبرة وانتي ماشيه وشايله الشنطة

قلتله : امشي بشنطة على اكتافي؟ هو أنا رايحه المدرسة؟؟؟




قالي :أو شنطة بعجل طالما بتحتاجي تشيلي حاجات كتير في رحلة يوم واحد يا كده يا رقبتك حتستمر

في الألم والشد العضلي و ارهاق عضلاتها

وبالفعل بدأت أسمع الكلام و أفضي شنطتي بل و أحيانا بانزل من بيتي حاطه على وسطي تحت العباية شنطة الوسط اللي الأطفال بيسموها البانانا




أو بانزل
من غير شنطة خالص في جيب عبايتي الموبايل وفي الجيب التاني مبلغ مالي يكفيني وبطاقتي والام بي ثري حول رقبتي ومش باين من تحت خماري
ولما باسافر باسافر بشنطة ظهر

وبالفعل مع هذا الاهتمام بشنطتي ورقبتي وكتفي حسيت براحة كبيرة وبدأ علاج الرقبة يبقى أحسن وبدأت ارتاح

وبعد عدة أيام وفي نفس عام العلاج بدأ معرض الكتاب وكلمتني صديقتي و أختي في الله وتوأمي الروحي على الموبايل وطلبت مني بعض الكتب للشيخ الدكتور محمد موسى الشريف ، بارك الله فيه ،وبالفعل ذهبت إلى المعرض وقمت بشراء أحب الأشياء إلى قلبي ألا وهي الكتب و قمت بشراء كتب للأبناء وبدأت في البحث عن كتب صديقتي ودار النشر هذه و مشيت مشي يمكن لفيت المعرض من أوله لآخره مرة واتنين وتلاته حتى وصلت للدار وقمت بشراء الكتب ومشيت للبوابة وركبت التاكسي و أول ما حطيت رجلي في التاكسي حسيت بنار في باطن أقدامي و طبعا أخحدت بالي إني كنت لابسه سابو بكعب 3 سنتيمتر بس كعب رفيع .. و أنا أساسا لا من أنصار الكعب الرفيع ولا حاجه أنا من النوع اللي باقع من غير كعب فما بالكم بالكعوب ..حتى أني يوم زفافي وكنت أرتدي ال5 سنتيمترات قلت لزوجي يا تسندني طول الفرح يا حتلف مرة تلاقيني عالأرض




المهم طلبت من التاكسي يذهب بي للمنزل الذي كنت أقيم فيه بالقاهرة و طلبت من البواب أن يحمل الكتب حيث أنها كانت بالعشرات ثم عدت للعيادة و حينما دخلت كنت أجر أقدامي جرا فنظر لي الطبيب وسألني : ما بك؟

ببراءة الأطفال و أقدامي تئن من تحتي قلت : مافيش حاجه بس ممكن كيسين تلج من بتوع العمود الفقري علشان أطفي النار اللي في أٌقدامي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

و لأكياس التلج دي حكاية أخرى بس المرة دي حاحكيها : بعد جلسات شد العمود الفقري بيكون الألم لا يوصف قوم إيه بيجيبوا أكياس بودر موضوعه بالفريزر ويحطوها على العمود الفقري مباشرة وكانوا دايما يتوصوا بيا يعني على كل عمودي الفقري بطوله ويمينه وشماله علشان العضلات أكياس تلج ، و إحنا إيه في شهر يناير وفبراير ومارس ، يعني عز البرد ، بس فعلا اتضح إنه علاج ممتاز وحديث لآلام و أوجاع العظام والعضلات وحتى اليوم عندي في التلاجة أكياس تلج استخدمها وقت شدة الألم..وفعلا أتى الطبيب بأكياس التلج ووضعتها تحت أقدامي وحسيت إنهم عملوا صوت زي ما حد يضع ماء بارد على شيء حار بيغلي .المهم نظر الطبيب إلى حذائي وقالي لي: انتم بتحبوا تتعبوا نفسكم ليه؟

قلت له يعني إيه؟ قالي : الحذاء بتاعك داه طبعا شيك وعالموضة بس الكعب داه مينفعش معاكي و لا لحالتك و اساسا مينفعش للستات كلها بجد يعني الموضة مش معناها إني اتعب ظهري ورجليا وعضلاتك مش بيقولوا راحتك تبدأ عند القدمين؟؟؟؟؟؟؟ والقدمين دول شايلين عمود الفقري اللي هو
أساس الحياة وانتي أساسا عمودك الفقري مفقود مفقود يا ولدي



وبعدين انتي حتبتدي برنامج مشي ووقوف وتمارين رياضية أنا عايزك متلبسيش الا حذاء المشي الأصلي مش أي حذاء كمان وبعدين يا ستي ما هم عاملينه أشكال و ألوان و بالذهبي وبالفضي

قلتله : وهو أنا يعني اللي غاوية عياقه وقلت في سري، الله يسامح اللي كانت السبب واشترلتي السابوو داه من الموول الجديد بتاع القاهرة
علشان حست إن أحذيتي مافيش فيها أنوثة
أنثوثة قال

وبالفعل ومن يومها و أختكم بتشتري كوتشي من اديداس و نايكي و تيمبرلاند ويوم ما يكون عندي خطوبة أو فرح بيكون مأزق علشان خلاص رجلي اتعودت عالكوتشي و الأحذية الرياضية



ومش حاحكيلكم حماتي بتعمل فيا إيه لما بتلاقيني لابسه كوتشي وشراب سوكيت تحت العباية

أكيد بتقول يا عيني عليك يا ابني

ولا أختي اللي لقتني رايحه عزاء من كام شهر ولابسة حذاء سكيتشر أسود وخلت اللي ما يشتري يتفرج عليا

والله يا جماعة مش باين ابدا إنه حذاء رياضي داه حتى انثوي خالص وشبه بتوع الباليه

بس بقى مش بيهمني كل داه راحتي و صحتي قبل أي شيء وبعدين إحنا نازلين الشارع لمهمات رسمية وبنرجع بيتونا نلبس كنساء و أنسات ما نحب طالما مافيش أغراب في البيت لا يحق لنا أن نتكشف أمامهم

ودلوقتي ياريت كلنا نشوف لابسين في أقدامنا إيه علشان بالفعل راحتنا تبدأ عند القدمين ووللرجال باقول خاصة لابني الكبير ارحم كتفك من شنطة اللابتوب عندك شنط كتير وشيك قوي بعجل و صغيرة مش ضخمة و أنا مستعدة اشتري لك واحده بس اوعدني انك تستخدمها وارحم كتفك ورقبتك



وكمان خلي بالك من الحذاء ...معظم الرجال يظل مرتديا حذاؤه لساعات طويلة و يظل الحذاء والجورب يخنقوا أٌدامه وساقيه وهذا خطأ خطأ خطأ


ومن أهم المواقع التي تعتني بالظهر والرقبة ما يلي:

http://www.back.com

كما أن اليوجا والبيلاتس من أهم الرياضات التي تساعد على تقوية العضلات وخاصة عضلات الساقين والعمود الفقري

http://pilates.about.com/od/pilatesforeverybody/a/Back-Pain.htm?nl=1

http://yoga.about.com

و أنا في الخدمة إذا أي حد احتاج استشارات طبية خاصة بالعظام والعضلات والعمود الفقران حيث أنني درست الكثير على الانترنت من أجل عمودي الفقري

ودمتم سالمين

عايزه فانوس

كل عام و أنتم بخير

مضى من شهر رجب أكثر من عشرين يوم وباقي القليل لنجد أنفسنا في رمضان شهر الصيام

و كام يوم كده وحنلاقي غزو صيني في كل المحلات والمولات

فانوس بيغني رمضان جانا وفانوس بيمشي ويقول وحوي يا وحوي

وطبعا بالرغم من كل الأحداث التي تحدث في الصين والاضطهاد اللي بيحصل للمسلمين

كلنا حنشتري الفانوس السحري ......أنا بأمانه مش بحب الفوانيس الجديدة دي ...بس أختي خبيرة الشراء كام يوم والاقيها حتكلمني تقولي نزلي حد ياخد فوانيس الأولاد من عند بتاع الأمن

ويومين وقبل رمضان ما ييجي يكون الفانوس اتكسر وباظ

صيني بقى

أنا بقى رجعت بذكرياتي عدة عقود

محدش يسأل كام عقد علشان اغلبنا حيتعقد

أنا عايزه فانوس زي بتاع زمان الفانوس المعدني أبو شمعه

اللي كنا بنمسكه بحرص ومحدش يشده من التاني الا صوابعه تتفتح وتتجرح

الفانوس البسيط ابو زجاج ملون

زمان كان الصبيان في بيت جدتي والبيوت المجاورة يعدوا علينا قبل رمضان بأسبوع أو اتنين ويبدأوا يجمعوا فلوس علشان يعملوا الفانوس الورقي ويزينوا بيه الشارع

كنت بابقى سعيدة قوي و اقف على دماغ جدتي علشان تديهم مبلغ حلو يساعدهم

ويافرحتي لما ييجي الأولاد ويقفوا في البلكونة يمرروا الزينة والفانوس و يرموا لبعض الحبال اللي شايله الفانوس والزينة علشان يجملوا الشارع

الله على جمال شوارعك يا بحـــــري انوار وزينة وفوانيس بقروش قليلة

الله على أيام البساطة وحب الجيرة والتعاون وصوت الشيخ محمد رفعت وهو بيأذن ويقول الله أكبر حسب التوقيت المحلي لمدينة القاهرة وانتظارنا الدقايق الباقية في الشباك نتفرج عالفانوس وننتظر الآذان ...مش بس آذان واحد ..لا داه أتكثر من عشرة في صوت واحد أعلاهم صوت مسجد المرسي أبو العباس

بجد بجد بقى عايزه فانوس بشمعه ويكون صغير مش عايزه الفوانيس أم مائة ومائة وشوية

بس يا ترى الفانوس داه بقى بكام؟؟؟؟؟؟؟؟؟؟؟؟؟؟؟

التعليق الجاي حاقولكم لما اشتريه واحطه جنب سريري وانور الشمعة وجوزي يبص لي ويضحك ويقولي حتعيشي وتموتي طفلة صغيرة بتفرح بلعبة أكتر ما تفرح بسلسلة أو خاتم ذهب وحيعايرني بايام خطوبتنا لما قالي أنا عايز أجيبلك هدية تحبي أجيبلك إيه؟ قلتله بكل عفوية : عروسة

لقيت الراجل قعد يضحك بصوت الناس اللي حوالينا في العربيات بقت مستغربة

يادي الكزوف

عروسة؟؟؟؟؟؟؟؟؟؟؟

آه عروسة ....على فكرة برضه من كام شهر سألني نفس الؤال وكان ردي نفس الرد بس المرة دي دبدوب عجبني في محل العاب بسيط

يومها قالي : متغيرتيش و أنا قلتله لا اتغيرت اخترت هدية أبسط من هديتي و أنا مخطوبة علشان الهدية رمز وقيمتها في الأسلوب والروح اللي بتتقدم بيها

وكل فانوس وانتم طيبين