كل عام و أنتم بخير
مضى من شهر رجب أكثر من عشرين يوم وباقي القليل لنجد أنفسنا في رمضان شهر الصيام
و كام يوم كده وحنلاقي غزو صيني في كل المحلات والمولات
فانوس بيغني رمضان جانا وفانوس بيمشي ويقول وحوي يا وحوي
وطبعا بالرغم من كل الأحداث التي تحدث في الصين والاضطهاد اللي بيحصل للمسلمين
كلنا حنشتري الفانوس السحري ......أنا بأمانه مش بحب الفوانيس الجديدة دي ...بس أختي خبيرة الشراء كام يوم والاقيها حتكلمني تقولي نزلي حد ياخد فوانيس الأولاد من عند بتاع الأمن
ويومين وقبل رمضان ما ييجي يكون الفانوس اتكسر وباظ
صيني بقى
أنا بقى رجعت بذكرياتي عدة عقود
محدش يسأل كام عقد علشان اغلبنا حيتعقد
أنا عايزه فانوس زي بتاع زمان الفانوس المعدني أبو شمعه
اللي كنا بنمسكه بحرص ومحدش يشده من التاني الا صوابعه تتفتح وتتجرح
الفانوس البسيط ابو زجاج ملون
زمان كان الصبيان في بيت جدتي والبيوت المجاورة يعدوا علينا قبل رمضان بأسبوع أو اتنين ويبدأوا يجمعوا فلوس علشان يعملوا الفانوس الورقي ويزينوا بيه الشارع
كنت بابقى سعيدة قوي و اقف على دماغ جدتي علشان تديهم مبلغ حلو يساعدهم
ويافرحتي لما ييجي الأولاد ويقفوا في البلكونة يمرروا الزينة والفانوس و يرموا لبعض الحبال اللي شايله الفانوس والزينة علشان يجملوا الشارع
الله على جمال شوارعك يا بحـــــري انوار وزينة وفوانيس بقروش قليلة
الله على أيام البساطة وحب الجيرة والتعاون وصوت الشيخ محمد رفعت وهو بيأذن ويقول الله أكبر حسب التوقيت المحلي لمدينة القاهرة وانتظارنا الدقايق الباقية في الشباك نتفرج عالفانوس وننتظر الآذان ...مش بس آذان واحد ..لا داه أتكثر من عشرة في صوت واحد أعلاهم صوت مسجد المرسي أبو العباس
بجد بجد بقى عايزه فانوس بشمعه ويكون صغير مش عايزه الفوانيس أم مائة ومائة وشوية
بس يا ترى الفانوس داه بقى بكام؟؟؟؟؟؟؟؟؟؟؟؟؟؟؟
التعليق الجاي حاقولكم لما اشتريه واحطه جنب سريري وانور الشمعة وجوزي يبص لي ويضحك ويقولي حتعيشي وتموتي طفلة صغيرة بتفرح بلعبة أكتر ما تفرح بسلسلة أو خاتم ذهب وحيعايرني بايام خطوبتنا لما قالي أنا عايز أجيبلك هدية تحبي أجيبلك إيه؟ قلتله بكل عفوية : عروسة
لقيت الراجل قعد يضحك بصوت الناس اللي حوالينا في العربيات بقت مستغربة
يادي الكزوف
عروسة؟؟؟؟؟؟؟؟؟؟؟
آه عروسة ....على فكرة برضه من كام شهر سألني نفس الؤال وكان ردي نفس الرد بس المرة دي دبدوب عجبني في محل العاب بسيط
يومها قالي : متغيرتيش و أنا قلتله لا اتغيرت اخترت هدية أبسط من هديتي و أنا مخطوبة علشان الهدية رمز وقيمتها في الأسلوب والروح اللي بتتقدم بيها
وكل فانوس وانتم طيبين
14 comments:
والله احنا لازم نقاطع الطينيين دول بقى
و بعدين انا كل ما اسمع حد بيتكلم على ايام زمان بتحسر على ايامنا
اللى لا ليها طعم ولا لون ولا ريحه غير ريحة عوادم العربيات و البنزين و الشيشة و السجاير
بس ربنا يهنيكى بذكرياتك الجميلة ده
و مافيش احلى من طفولتك لانك حد بجد حلو اوى اوى اوى
ربنا يخليكى يا رب
يا رو الجميلة
الصينيين يستاهلوا نسميهم الطينين بس يا ترى دي غلطة كي بوردية والا انتي تقصديها؟؟؟
جيلكم يا حبيبه على اد ما اتظلم في البيئة والحياة البسيطة على اد ما التكنولوجيا خلت عالمنا صغير
يعني لولا التكنولوجيا كان زماني معرفش بنوته حلوة حبوبة اسمها روووووووو
وتسلميلي يا جميلة الروح ويخليكي لخالاتك أم البنات و نووو
كل اللى بقوله اول ما بسمع او بشم ريحة رمضان
ايووووه
ليه ريحة وقدسية جميلة
بقول
(اللهم بلغنا رمضان )
تقبلى مرورى
وعايزة فانوس
أميرة
(ملكة بحجابى)
يا أميرة يا ملكة بحجابك انتي اسكندرانية والا إيه؟؟؟
مبليقولش أيووووه إلا الإسكندرانية أمثالنا هههههههه
لو كنتي اسكندرانية يبقى نتفق بقى على موعد ونجيب فانوس وميكونش صيني السنة دي
ربي يبارك فيكي و يجعل أيامك حلوة ويقبل صيامك وقيامك وقرآنك في رمضان وطول العام
حلو احساس الطفولة
احب دوما في كل سنة ان احضر فانوس رمضان متل الأطفال
رمضان كريم حبيبتي
وكل عام وانت بخير
جارة القمر
رمضان كريم على الجميع يارب
كده محتاجين نجيب اوتوبيس ونتجمع ونعمل رحلة لشراء فانوس؟؟؟ فكرة حلوة
يارب يحلي أيامنا ويجعلها كلها سعاده في ظل حب الله والعبادة
انا عمري ما اقتنع انا غير بفانوس بشمعة
انا اصلا عندي فانوس بشمعة
وصفيح
ومعمول كمان من صفيح علب السمنة
شفتي بقه
كل سنة وانتي بخير وصحة وسلامة
انا جيت اسلم علي السريع
دمتي بخير
الله يا مها ... أنا عايزة واحد زيه...امبارح زوجي لما باقوله عايزة فانوس من بتوع زمان الصفيح ..بصلي بصة استنكار إني لسه طفلة حتى و أنا قربت أجوز ابني الكبير ، مش قربت قوي بس يعني الجدع قرب يخلص الجامعة أهو ، وسنتين ويقولي اخطبيلي يا مامافلانة.....حاجيب واحد زيه قريب بس دعواتك الصين متكونش محتلة كل ارفف المحلات اللي بتبيع الفوانيس
كل عام و أنتي إلى الله أقرب ولطاعته أدوم
هو في زي ايام زمان
ايام الابساطة
ايام ما كان الاطفال اطفال بجد
مش مدمنين تلفزيون وكمبيوتر
كل سنة وانت طيبة مقدما
واتمنى تشرفيني في مدونتي
آه من قلبي
شكرا لمرورك زفعلا مافيش أحلى من أيام طفولتنا رغم إن الصغار بيبصوا لها على إنها زمن جاهلية
خدى بالك لالفانوس يطلع منة جنى و يقولك شبيك لبيك
بس ياترى لو دة حصل حاتطلبى منة أية ؟؟؟؟؟
عيد سعيد يا أستاذ خالد
لو طلعلي الجني بتاع الفانوس حاطلب منه فلوس كتييير بس مش علشاني أنا مش عايزه فلوس علشان أنا عايزة الجنة
الفلوس اللي حاطلبها حاطلبها للفقرا والمساكين والغلابه اللي ماليين بلدك و لا عارفين ياكلوا ولا يسا يشربوا ولا يتعالجوا ووووووووووووووووووووو
ياه داه على كده حاطلب كام مليار؟؟؟؟
السلام عليكم ورحمه الله وبركاته
تصورى افتكرت وانا صغيره
بقول لمامتى عايزه عروسه
قالتلى:ما انتى بقيتى عروسه قولتها بعففيه خلاص هاتى عريس بقى
كنت فى اولى اعدادى.
ههههههههههههههههههههه
بس انا مش مستغربه تقولى انك عايزه عروسه اصلى فى نفسى فى عروسه برضه.
لو بقيت فى موقفك هصر على العروسه اصرار
شكلنا حنطلع قرايب يا تيك كير...سبحان الله
Post a Comment