Monday, October 18, 2010

الإسكندرية أرملة البحر المتوسط




البوست النهارده عن إسكندرية وعن شط إسكندرية



داه بياع غزل البنات اللي كتير أكلناه زمان


يا جمالك يا إسكندرية وقت الغروب







ذرة مشوي وترمس؟


زنقة الستات





حدائق المنتزة












عجبتكم عروس البحر المتوسط ؟

دي صور عن إسكندرية بتاعتي أنا اللي عشت فيها أجمل سنين عمري

دلوقتي لما بامشي عالبحر مش بالاقي البحر

بلاقي بلوكات بلوكات


 وشواطيء مقفوله مرة شاطيء فلان المميز ولا هو مميز ولا حاجه كله كراسي و مباني ضيعت صورة الشاطيء

أو شاطيء علان المجاني وطبعا هو مش مجاني بس أهو كلام

طيب الناس تنزل الميه فين؟

بلاش الناس اللي عندها شاليه أو شقه في الساحل

باتكلم عن الطبقة اللي عايشه عالهامش 

و أحلى ما عندها قعدة على الشط ساعة العصاري


و أكشاك عجيبة الشكل والمنظر سرقت أحلامنا بالبحر و أمواجه





ومش حاتكلم على نادي العمال ونادي الموظفين ونادي المهندسين ووووووو اللي خلوا منظر الشط مباني مباني مش شط خلاص

والا وزارة الدفاع اللي حسستني إن العدو من أمامنا مش عارفه الظاهر هم كمان بيبنوا مبنى جديد عالشط






خسارة بقى عندنا قدرة رهيبة على تدمير كل ما هو طبيعي

يا خسارة يا إسكندريتي

==================================


ملحوظة : استعرت صورتين تلاته من أخ لنا 


اسمه 


fisher man


شكر ليه لسماحه بوضع صوره عندي 

49 comments:

شمس النهار said...

اسكندريه هي فين اسكندريه

اللي موجود ده دلوقتي مسخ
فضلوا يلطشوا فيها لحد مافقدت جمالها

عملولها نيو لوك فاااااشل

فين الفيلات الجميلة اللي كان ليها طابع خاص
هدوهااا وبنوا عفاريت مرده من الخرسانه
وشوهوا المنظر

فين اكباين اللي بدل مايجددوها ويحلوها
هدوها علي الاقل ماكنتش مداريه الكورنيش

فين الروقان في سبتمبر
والمشي علي الشط واكل الجيلاتي في الشتا

اسكندريه ماريه وتربها زعفران
خلاص بح

بس عايزة اقول لك جيلي واللي قبلي همه اللي زعلانين
لكن الجيل الجديد اللي ماشفش ولا داق حلاوة اسكندريه القديمه مش فارقه معاه

بوست قلب المواجع
اااااه ياسنكدريتي وذكرياتي فيكي

موناليزا said...

وهذا للأسف
حتى الحاجات البسيطة لازم يتدخلوا فيها ويحولوها لإفادة مجموعة بعينها بغض النظر عن الباقى

رأس البر برضه ماعدتش زى الأول:(

جايدا العزيزي said...

فعلا ياقلبى

اسكندريه زمان كانت عروس البحر المتوسط

بس جايز التغير ده يكون نتيجة الزحام

وتعداد النسل اللى اخرنا وجبلنا زكام

حلووو اوووووووووى البوست

ربنا يحرسها

اشكرك

تحياتى

كلمات من نور said...

شمس النهار

حقيقي كلامك حرف حرف وكلمة كلمة ...فاكره كباين ستانلي؟كان عندنا كابينه قضينا فيها أحلى أيام وكان فيها حاجات ترجع لايام جدي الله يرحمه ..رحنا ندفع الاشتراك السنوي قالولنا اشتراك ايه احنا هديناها...إزاله طيب حاجاتنا فين؟؟؟؟؟؟؟؟؟؟ قالوا حتلاقوها في المكان الفلاني .طبعا رحنا ولا لقينا حاجه وخلصت الشغلانه.كراسي بحر مصنوعه باليد ووووووو
حتى الذكريات بخلوا بيها

والله المستعان

جيلنا وجيل اللي قبلنا هم اللي عارفينها يا شمس زي ما قلتي



موناليزتي

اه في كل مكان يا حبيبة جاتلنا لعنة
التدمير


جايدا

السكان متخليش البلد تموت ونقتل كل ما فيها ..انا مش باتكلم عن العمارات انا باتكلم عن الشط هنا يا فتاتي من بحري للمعمورة ...تحياتي


نورتوني

Tamer Nabil said...

ازيك نور

اخبارك اية

مشكورة وتسلمى على اللفتة الجميلة والصور الرائعة لعروس البحر المتوسط

مع خالص تحياتى

كلمات من نور said...

ازيك يا تامر

الحمدلله بخير يا سيدي ....تسلم يارب ...نورتني

Anonymous said...

البلوكات الاسمنتية دى مهمة علشان النحر مايكلش البر أما باقى الحاجات إللى بتتكلمى عنها فهما إللى كلوها فى بطنهم


خالد فرج

كلمات من نور said...

خالد

اكيد كلامك بتاع النحر على عيني وراسي بس انا قصدي اننا عرفنا نشوه ونقتل الجمال في بلادنا

محمد الجرايحى said...

كل شئ جميل فى حياتنا لم يعد له وجود

كلمات من نور said...

أستاذي محمد الجرايحي

نحمد الله تعالى أن شهدنا الجمال ولكن ماذنب الأجيال الحالية والقادمة؟؟؟؟؟؟؟؟؟؟

الله السمتعان

نورتني

فشكووول said...

السلام عليكم يا صاحبة النور
تحياتى

فييييين اسكندريه دى .. ما عادتش اسكندريه .. بقت اى شيئ الا انها اسكندريه
فى 11 اكتوبر 2008 كتبت بوست عن الاسكندريه اليك بعضه
(لمسافه بين المنشيه الى خالد بن الوليد حيث اقامتى فى المصيف كلها محتله بالانديه والنقابات - البحر اختفى خلف هذه النوادى - هذا البحر ( المرأة العاريه ) يجب حجبها عن اعين الفضوليين السائرين على الكورنيش .. يجب الباس البحر الحجاب او النقاب فمن العيب ان تراه اعين الرجال او النساء على السواء واذا اردت البغاء مع البحر فهناك اماكن مرخصه لممارسه هذا البغاء - فهذا الشاطئ الفلانى برسم دخول وثمن للكرسى وثمن للشمسيه مرخص فيه البغاء مع البحر والامواج ويمكنك مشاهدة مفاتن البحر المحرمه وممارسه البغاء مع امواجه - حجب الشاطء وحجبت المياه عن المصريين - حجب بحر مصر عن مصرلابد ان تدفع ثمن للاستمتاع ببحر بلدك مع انه ملك لك .. ملك لكل المصريين نحن نبيع لكم عيونكم لترى البحر - كم اصبح تعجيزيا - كم اصبح البحر مكلفا .. كم اصبح البحر غال .. غال .. غالى على جيوبنا - وبعد انتهاء الايام التى كنت اظن انها مصيف ولكنى اكتشفت انها مسحوق غسيل لغسل الجيوب .. نبيع لكم البحر .. نبيع لكم الهواء .. من اجل تطوير الشاطئ .. من اجل توسيع الكورنيش).

لو حبيتى ممكن ترجعى للبوست وحتلاقى فيه كلام كبير قوى
تحياتى

كلمات من نور said...

فشكوول

وعليكم السلام يا أستاذي ورحمة الله وبركاته

كلماتك موجعه و لو أضفنا السنوات الثلاث التي تلت البوست الخاص بيك زد على الوجع أوجاعا ...خسارة ان ولادنا اتحرموا من حاجات كتير عشناها ....والله جيل غلبان رغم انه فرحان بإنه في زمن تكنولوجيا محصلتش


نورتني

عامي said...

مصر كلها فقدت حلاوتها
وليتها كانت المباني والشواطيء فقط
وانما المصريون انفسهم
يتجهون الى "التغجر" مع احترامي للغجر الحقيقيين

كلمات من نور said...

عامي

ربي يهدينا ويعيدنا لما كنا فيه من خير وصلاح .قل آمين

tote soly said...

أنا بحب اسكندرية جدا جدا وبموت فيها اجمل بلد رحتها وعشت فيها ايام جميلة
وليا فيها قرايب كتير من أهلى
بس اتغيرت كتير عن زمان زي ما قلتى الواحد زمان كان ينزلها ويمشي في اي مكان ويحس انه ماشي في بلده
اما دلوقتى اتغيرت كتير

تسلمى يا نور على الصور الجميلة

كلمات من نور said...

tote soly

اهلا وسهلا بيكي يا فتاتي

نورتيني

وصحيح كلامك اتغيرت اسكندرية واتغيرت للأوحش مش للأحسن ويارب ترجع زي ما كانت

همســـــــــــــ عتاب ـــــــــــــــة said...

عروس البحر المتوسط اصبحت عجوز البحر المتوسط لما فعلوه فيها معتقدون انها اصبحت اكثر جمالا ونظاما ولكنها افتقدت حيويتها وقدرتها علي الجذب
اشكرك علي التوبيك الجميل علي اد ماهو في المضمون علي قد مانتي طرحتيه بطريقه شيقه كوميديه
اشكرك علي الموضوع

كلمات من نور said...

همسة واقع

معاكي حق يا فتاتي في كلامك والواحد بيحب يخلي الناس ميزيدش عندها النكد فبيحاول يرسم ابتسامة تفاؤل والله المستعان

نورتيني

bastokka طهقانة said...

اموت في اسكندرية و اللي متها

كلمات من نور said...

طهقانه هانم

واحنا نحبوا اللي يحبونا يا قمر

نورتي

اسكندراني اوي said...

معاكي ان مش دي اسكندريه الله كبرنا فيها وحبيناها
اتمسخت معاكي
بس حيفضل بحرها وهواها في دمنااااااااااااااااا

كلمات من نور said...

إسكندراني قوي

كلامك زين فعلا إسكندرية في دمنا

ولسه شامين ريحة بحرها ورملها النقي ولسه عايشه في قلوبنا زي ما كانت

ويارب ترجع

tarek alghnam said...

جميله الصور
ربنا يبارك فيكى
واتمنى المسئولين يبطلوا تشويه فى الطبيعه
بعض الصور التى رأيتها عندك تمثل لى ذكريات رائعه
اشكرك على هذا البوست المتميز
مع ارق تحياتى

Treat and Trick said...

Assalammmualaikkum Sister, beautiful pictures and thanks for the visit...

كلمات من نور said...

طارق الغانم

تمنيات يا أخي طارق بس مين يسمعنا

المسؤولين الأيام دي خبرا في التشويه و الله المستعان

سعيدة إن ذكرياتنا لسه في قلوبنا و مسكين من ليس له ذكريات حلوة


شكرا للتواصل

مرايتى said...

للأسف بقينا نشوه الجمال تحت مسمى التطوير فى كل مكان مش إسكندريه بس
بس ما ننكرش إنها صح فى بعض الأوقات إلى هى قليله أصلا
ربنا يهديلنا الحكومه

بس مش حغير فكرتى عن إسكندريه لأنى مارحتهاش قبل كده ورسمى لها صوره فى خيالى هى إلى شوفتوها بيها زمان إلى حبيتوها بيها

تسلمى على البوست

كلمات من نور said...

تسلميلي يا مرايتي عالكلام الحلو داه والحمدلله لسه اسكندريتي في قلبي وذكرياتي أحلى بلد .ويارب أشوفك فيها قريب يا فتاتي

Dr Ibrahim said...

جميلة اسكندرية وهواها اللى يشرح القلب

كلمات من نور said...

دكتوري المفضل

نورت مدوناتي النهارده بجد سعيدة إني اطمنت عليك

Tarkieb said...

بس برضة المناظر الاولانية لسة موجودة واسكندرية بجد جميلة ومازالت بس انت بس اللي صعبان عليكي تراجع الجمال فيها شوية

كلمات من نور said...

تركيب

كلامك أكيد صحيح بس الواحد بجد زعلان على اسكندريتنا والله المستعان

نورتني

أم علي said...

يعني سبحان الله كأنك تحكي و تعرضي صور شاطئ مدينتي الجملة عروس الساحل " سوسة" يعني لماذا تشويه الجمال و الا هو مزاج حتى يرتاح فلان و علان
الله يهدي و أحنا لقينا ذكريات جميلة نتذكرها لكن أولادنا ...
أنار الله دربك و كلماتك يا نور

كلمات من نور said...

أم علي الحبيبة

اهلا وسهلا نورتيني

فين الغياب يا أم علي؟

صحيح كلامك عن المدن الجميلة التي دمروها ودمروا الجمال وذكرياتنا الجميلة

الله المستعان يا أم علي

نورتيني

أبو حسام الدين said...

السلام عليكم
بنطق ناس الأسكندرية الأصليين أقول: "أيووه على الإسكندرية
أجمل مدينة بشاطئها الرائع، وغنائية فيروز عن شط اسكندرية، رائع والله.
كما أتذكر قبر القطب العارف أبو العباس المرسي الذي يسميه أهل الإسكندرية بالمرسي أبو العباس وهو تلميذ العارف أبي الحسن الشاذلي المغربي، وكذلك تلميذهم العارف بالله صاحب الحكم العطائية ابن عطاء الله السكندري.
كل هذه الأشياء دارت بخلدي وأنا أقرأ موضوعك.
بالنسبة لتغير المعالم فهذا هو أفة العصر أختي فكل شيء طبيعي يغيروه.
جزاكِ الله خيرا

كلمات من نور said...

أبو حسام الدين

صح أخي أيووووه على اسكندرية وشط إسكندرية وجمالها القديم

و الله يسامح كل من شوه جمال بلادنا فأصبحت على ما هي عليه الآن .....شكرا لك ولتعليقك

نورتني

اسماء عبدالعزيز said...

الطبيعة والبساطه اجمل بكتير
تدخل الانسان بيهدم جمالها
كان زمان بنايات جميلة وفيلات رائعة تنم عن فن العمارة الصيل
دلوقتي اتفرجي

بصراحة أنا بعشق الاسكندرية وبحرها الجميل

دمت بحب

عبدالله أتومنار said...

مدينة جميلة ماشاء الله

شكرا لك على الصور الرائعة

كلمات من نور said...

أسماء

أخي عبد الله

شكرا لكم ولتواصلكم معي

نورتوني

nour shahen said...

اسكندريه كانت حبى عشقى كفايا تتمشى فيها علشان تشعر بكل حبة رمل وكأنها نغم بيحيطك
بقالى كيتر بصراحه منزلتهاش لكن اخر مره كنت فيها تقريبا من سنتين كانت غريبه بجد
حتى الميه بتاعتها يا ربى اتفننو فى انهم يطفشونا منها
لما المخلفات بتاعت السفن تترمى فيها وتبقى حتى تمشية الكورنيش تسد النفس
سيبك من المنظر يعنى هقول هنغمض عنينا ونتخيل اسكندريه القديمه
طيب نعمل ايه فى الريحه اللي كانت والله العظيم تسد النفس وانتى راكبه وبتقربى بس للكورنيش
لا اله الا الله
يعملوا فيها ربع اهتمام شرم الشيخ والله تستاهل

مدونة رحلة حياه said...

السلام عليكم
هو احنا عندنا حب انن نقتل كل شئ جميل بدعوى التنمية والتطوير
حاولى تعملى او تبصى بس على اى حاجة حلوة كانوا الناس بيرتاحوا فيها حتى ودورى عليها دلوقتى
هتلاقى حاجة

كلمات من نور said...

نور شاهين

رحلة حياة

مع الأسف لو تشاهدوا الدمار اللي لحق بإسكندرية اليومين اللي فاتوا تزعلوا قوي عليها

الله المستعان على الأخطاء اللي بتؤي للدمار

فاروق بن النيل said...

نور.......
عندك حق لقد رأيت مثلك إسكندرية من زمان عام 1975 والحقيقة كانت مختلفة عن هذه الأيام ولذا عندما قررت أن تكون لى شقة للتصييف فى إسكندرية لم أختارها داخل إسكندرية فقد وجدتها بقت زى القاهرة فقررت أن تكون خارج إسكندرية فى البراح والوسع فكانت فى الساحل الشمالى(الكيلو 21) وحتى أتنفس بحرية دون إختناق .............
فعلا فى بلدنا ناس ضد وبتدمر الطبيعة.

walaa tulip rose said...

والله معاك حق .... اسكندرية راحت وراحت ايامها
ده انا فاكرة شط رشدي كان فيه صخرة جمييلة وكانها كنبة خاصة في وسط البحر
ياما عشنا فيكي يا اسكندرية
فين الجرانيتا بتاعة زمان في عز الشتا والبرد نتمشي ع البحر والايس كريم
محطة الرمل والفشار السخن ...
كل شيء جميل في اسكندرية بي مشوه مالوش غير الصورة السابقة في خيالناوذكرياتنا

كلمات من نور said...

عمو فاروق

وردة التيوليب

اقول ايه بس والواح يوم بعد يوم بيزيد حزنه على اسكندرية ؟؟

الحمدلله على كل حال

bastokka طهقانة said...

:))

تايه said...

اصبح وامسى على اسكندرية اللى كانت
وجايلك يا ساحل ايوه جاى

elsayed azab said...

من أحب المدن إلى قلبى ..

كل سنة وإنتى طيبة ..

عيد سعيد إن شاء الله ..

تحياتى

crazy said...

هههه الله يرحم اسكندريا زماااااان الموضوع جميل جدا و الصور اجمل =)

ِعلي الزيبق said...

فعلا بقي عندنا قدرة كبيرة علي التدمير ولكن الاقوي في التدمير هو تدمير العقول والنفس اصبحنا نتفنن في اذاء بعضنا ونتفنن في تحوير الكلام وقلب الحقائق ومحاولة غسل ادمغة بعضنا والسيطرة عليها ذكر الناس بالشر ومحاولة تدمير يومهم
ليست فقط الاسكندرية النتي طالها التدمير

 
Copyright 2009 لحظة نور. Powered by Blogger
Blogger Templates created by Deluxe Templates | Blogger Styles
Wordpress by Wpthemescreator